Lëvizja Socialiste për Integrim ka paditur ish-aleatin e saj, kryeministrin Edi Rama në Prokurori. Burime zyrtare nga LSI deklarojnë se padia vjen pasi “kryeministri shkeli ligjin kur ftoi policinë të marrë vota për PS”.
Jo vetëm kaq, por në deklaratën e saj, LSI shkruan ndër të tjera se “këto deklarata të Ramës tregojnë qartë se Kryeministri nuk është në gjendje të qëndrueshme mendore”.
“Edi Rama shkeli ligjin kur ftoi policinë të marrë vota për PS-në. Thirrjet e Ramës për policinë e shtetit përbëjnë ngjarjen më të rëndë të thyerjes së ligjit dhe thyejnë rëndë moralin te detyrës së një Kryeministri gjatë një fushatë elektorale në këto 25-vjet.
Kjo ngjarje dhe kjo veprimtari e Kryeministrit është në kundërshtim me Kushtetutën dhe gjithë ligjet, Kryeministri i vendit me këtë thirrje ka shkelur të gjithë hierarkinë shtetërore të akteve ligjore.
Shkeljet që nga Kushtetuta dhe deri tek VKM-ja më e fundit që ka miratuar qeveria e tij, si pjellë e marrëveshjes politike të datës 17-18 Maj 2017.
Nëpërmjet këtij akti Rama ka shkelur ligjet që e ndalojnë Policinë e Shtetit të marrë pjesë në fushatën zgjedhore.
Rama me veprimet e tij të cilat tashmë nuk i bën më fshehtas, por hapur dhe publikisht, ka kryer shkelje të rënda rregullat në një proces zgjedhor.
Thirrjet e Ramës tregojnë se ky shtetas ka konsumuar njëherazi elementë të veprave penale, prandaj nevojitet shqyrtim dhe hetim objektiv
Çmojmë objektivisht fillimin e ndjekjes penale, dhe kryerjen e hetimeve të paanshme në lidhje mbi këtë çështje.
Çmojmë të domosdoshëm kontrollin mjekësor të Kryeministrit, për të verifikuar nëse ai është i aftë mendërisht ose jo, që të kryejë detyrën e Kryeministri.
Nga këto deklarata tregohet qartë se nuk është në gjendje të qëndrueshme mendore.
Nëse një tronditje e tillë psikike, vjen si pasojë e panikut, prej fuqisë së rritjes së mbështetjes popullore për LSI, sërish nuk është aspak shkak për përjashtim nga përgjegjësia penale dhe politike.
Nisur nga deklarata e papërgjegjshme e Kryeministrit, e vlerëson të nevojshme që Presidenti i Republikës të thërrasë mbledhjen e Këshillit të Sigurisë Kombëtare.
Kërkojmë mbledhjen e Këshillit të Sigurisë Kombëtare për të analizuar veprimtarinë antiligjore të Kryeministrit të vendit.
Shprehim gatishmërinë dhe vendosmërinë e saj për zbatimin e ligjit”, shkruhet në deklaratën e LSI dërguar medieve.
Akuzat e ndërsjellta ndaj PS dhe LSI kanë nisur që nga marrëveshja e 18 majit mes Ramës dhe Bashës. Por, duket se palët në fjalë nuk janë mjaftuar me akuzat e forta, duke arritur deri në padi.
