Pasditen e sotme në qytetin e Elbasanit kanë zbarkuar drejtuesit e organeve ligjzbatuese në vend, për të zhvilluar një takim me prefektin, Gledian Llataj. Në takim janë prezent ministri i Brendshëm, Sandër Lleshaj, kreu i SHIK, Drejtori i Përgjithshëm i Policisë, Ardi Veliu, drejtuesja e Prokurorisë Elbasanit, Drejtuesit e Drejtorisë Vendore Elbasan.
Policia e Shtetit zhvilloi sot një operacion antidrogë të shtrirë në qytetin e Elbasanit dhe në kryeqytet, ndërsa ka shoqëruar 10 persona me precedentë penalë. Në mesin e të shoqëruarve, 5 prej tyre rezultojnë me urdhër arresti.
Ky takim në Elbasan vjen fill pas atij të Shkodrës, ku Veliu së bashku me ministrin e Brendshëm diskutuan për 90 minuta me prefektin e ri të Shkodrës, ndërsa u theksua mes tjerash se prioriteti kryesor i qeverisë dhe ministrisë është garantimi i sigurisë së qytetarëve.
Qyteti i Elbasanit dhe ai i Shkodrës ditët e fundit kanë qenë pika të nxehta për Policinë. Në mes të qytetit të Elbasanit u ekzekutua avokati i Emiljano Shullazit, Ravik Gurra, ndërsa në Shkodër u ekzekutuan pranë shtëpisë dy vëllezërit Bilali.
