Sandër Lleshi ka përplasur kryeministrin Edi Rama me presidentin Ilir Meta. Ky i fundit i tha “JO” dekretimit të Lleshit si ministër të Brendshëm.
Megjithatë, duket se Rama nuk do të heqë dorë kaq lehtë pas “JO”-së së Metës. Kryeministri ka zhvilluar një takim me grupin parlamentar të Partisë Socialiste, ku në fokus ka qenë pikërisht mosdekretimi i Lleshit si ministër i Brendshëm, nga ana e Metës.
Rama, teksa ka folur me grupin parlamentar të PS-së ka dhënë mesazhin e qartë se nuk duhet të ketë asnjë mëdyshje për mbështetjen e Lleshit, si ministër të Brendshëm. Mësohet se Rama ka zbardhur po ashtu lerën e presidentit Meta lidhur me mosdekretimin e Lleshit.
Mësohet se në letër, Meta është shprehur se nuk ka bindjen për kandidaturën e Lleshit. Më tej, teksa ka komentuar këtë vendim të presidentit, Rama e ka cilësuar atë si shkelje të Kushtetutës.
“Nuk ka asnjë mëdyshje për mbështetjen e Sandër Lleshit si ministër i Brendshëm. Në letër, presidenti Meta shkruan se nuk ka bindjen për kandidaturën e Lleshit. Nesër në seancë do të nisim t’i krijojmë bindjen presidentit. Mosdekretimi është shkelje e Kushtetutës”, mësohet të ketë thënë ndër të tjera Rama në mbledhjen e grupit parlamentar të PS-së.
Kujtojmë se sot, kreu i Kuvendit Gramoz Ruçi ka zhvilluar po ashtu një takim me Presidentin Meta lidhur me ngërçin politik të krijuar për dekretimin e ministrit të Brendshëm.
