Autoritetet australiane kanë sekuestruar sasinë më të madhe të drogës që ishte importuar ndonjëherë në vendin e tyre. Bëhet fjalë për 1.6 ton drogë të llojit metamfetaminë, e cila vinte nga Tajlanda.
Droga ishte fshehur në mënyrë të pazakontë, në disa pako të mbyllura me vakum të vendosura në brendësi të disa bokseve të magnetofonave.
Në momentin mallrat u skanuan në Qendrën e Kontrollit të Kontejnerëve në Melbourne, para se të transportoheshin në destinacionet e caktuara, ata panë se diçka nuk shkonte dhe pasi i hapën ato zbuluan drogën e fshehur brenda paketimeve.
“Kjo është sasia më e madhe e metamfetaminës që kemi parë ndonjëherë në vend dhe nuk demonstron vetëm natyrën e ashpër të atyre që janë përfshirë në këtë veprimtari kriminale, por vendosmërinë e Zyrtarëve të Forcës Australiane të Kufirit (ABF) në Victoria dhe në të gjithë vendin për të ndaluar këto importe,” deklaron Craig Palmer, komandanti rajonal i ABF Victoria.
Autoritetet thanë se kjo ngarkesë e konfiskuar kap vlerën e 1.2 miliardë dollarësh australianë në “çmim rruge”, e cila është e barabartë me 837 milionë dollarë amerikanë.
Përveç metamfetaminës, u gjetën edhe 37 kilogramë heroinë të fshehura në këto paketime.
“Në vitin e fundit ABF bëri 43,000 zbulime të drogërave të paligjshme që peshonin më shumë se 11.8 ton, kështu që ky sekuestrim është i barabartë me më shumë se 13% të drogës totale që kapëm vitin e kaluar”, tha Palmer.
Investigimi për këtë rast po vazhdon dhe nuk është bërë akoma asnjë arrestim.
Në janar, autoritetet amerikane konfiskuan metamfetaminë me vlerë gati një miliardë dollarë të nisur për në Australi. Ky ishte rasti më i madh ndonjëherë, i kapjes së drogës në tokën amerikane, njoftoi policia australiane pas një operacioni të përbashkët. Në atë konfiskim, droga u gjet e fshehur brenda pajisjeve elektronike.
