Virusi vdekjeprurës kinez ka ngritur alarmin anembanë botës, ndërsa shifrat e raportuara janë negative. Çdo minutë raportohet nga një viktimë, e tashmë është marrë vendimi se coronavirusi është një emergjencë globale. Alarmi është dhënë nga Organizata Botërore e Shëndetit, ndërkohë që epidemia vazhdon të përhapet jashtë Kinës. Me anë të një konference për mediat në Gjenevë, shefi i OBSH-së Tedros Adhanom Ghebreyesus, nuk nguroi të tregonte frikën që virusi të transmetohet anembanë globit.
“Arsyeja kryesore nuk është ajo që po ndodh në Kinë, por ajo që po ndodh në vendet e tjera”, tha shefi i OBSH-së.
Shqetësimi është se mund të përhapet në vendet me sisteme të dobëta shëndetësore.
Numri i rasteve të konfirmuara është rritur në 7,711, duke përfshirë më shumë se 1,700 raste të reja të mërkurën, ndërsa deri tani virusi ka shkaktuar 170 viktima.
Tedros tha se 99% e të gjitha rasteve të konfirmuara janë në Kinë. Pesëmbëdhjetë vende të tjera kanë konfirmuar 68 raste. Të 170 vdekjet, me një përjashtim, kanë ndodhur në Wuhan dhe në provincën Hubei.
