Sot pritet të jetë një ditë e ‘nxehtë’ në Kuvend. Punimet e seancës plenare nisin në orën 10:00, ku do jetë e pranishme edhe Kryeprokurorja e Përgjithshme, Arta Marku, e cila do të raportojë për herë të parë, pas marrjes së detyrës mbi dosjet e vitit 2017.
Në Kuvend pritet të miratohet varianti i ri i ligjit për Teatrin Kombëtar. Një vendim i tillë vjen pas takimit të ditës së djeshme mes kryeministrit Rama, dhe kryeparlamentarit Ruçi, në Kryesinë e Kuvendit.
https://tiranatoday.com/avazi-i-teatrit-rama-shkon-ne-zyren-e-rucit-me-3-te-tjere/
Sikundër e ka njoftuar edhe më herët, opozita do të udhëtojë në drejtim të Vlorës, për të zhvilluar mbledhjen e radhës. Në javën e katërt të bojkotit të seancave plenare, përfaqësuesit e opozitës do të zhvillojnë një tjetër mbledhje paralele me Kuvendin, në një qytet ku njësoj si Shkodra, Elbasani dhe Durrësi, për opozitën, është i komanduar nga krimi.
Denoncimet e Bashës
Sikundër tre takimet e para, Basha pritet të denoncojë me emra individët me rekorde kriminale, që janë të lidhur me qeverinë. Një ditë pas paralajmërimit nga kreu demokrat, PD depozitoi kallëzim penal për kryeinspektorin e IKMT-së në Vlorë, Fatmir Meta, i cili u përplas verbalisht me deputetin demokrat të Vlorës, Agron Shehaj.
https://tiranatoday.com/pd-kallezon-ne-prokurori-kreun-e-ikmt-se-policia-mban-ende-ne-komisariat-personat-qe-i-kundershtuan/
Takimi
Në seancën e sotme të opozitës pritet të marrë pjesë edhe aleati i ri i demokratëve, Shpëtim Idrizi, ndërkohë që do të mungojë kreu i PBDNJ-së dhe deputeti i Vlorës, Vangjel Dule.
Gjatë fjalës së tij, Basha pritet të kërkojë nga mazhoranca dhe kryeministri Rama të miratojnë pa asnjë vonesë nismën kushtetuese të opozitës, për Vetting në politikë.
Dy ditë më parë, mazhoranca në Komisionin Parlamentar të Veprimtarisë Prodhuese, pranoi dekretin e Presidentit Meta, duke i bërë disa ndryshime ligjit për Teatrin. Sipas amendimeve, hapet gara për realizimin e projektit si dhe zhvillimin e zonës përreth, në qendër të kryeqytetit.
Varianti i mëparshëm parashikonte që gjithçka të realizohej nga kompania “Fusha”, e cila merrte përsipër ndërtimin me fondet e saj të godinës së re sipas projektit të arkitektit të njohur danez Bjarke Ingels, në këmbim të mundësisë për të ndërtuar një bllok pallatesh shumëkatëshe në zonën pas Teatrit, në një sipërfaqe e cila në pjesën dërrmuese është në pronësi shtetërore.
Shumica u tërhoq nga ligji i posaçëm i propozuar më parë nga Qeveria, pasi hasi në kundërshtime nga Komisioni Europian, i cili në letrën dërguar autoriteteve shqiptare, theksonte se i inkurajonte ato “që të ndjekin pajtueshmërinë me parimet e prokurimit publik të BE-së, dhe të sigurojnë qasje jodiskriminuese në treg”.
Por sipas opozitës, ligji ka rënë, dhe sot mazhoranca duhet të kalojë në Kuvend vetëm dekretin e Presidentit, duke i thënë “Po” ose “Jo”.
