E duan Real Madrid dhe Barcelona, talenti Erling Haland zbulon të ardhmen

Talenti 20-vjeçar, Erling Haland ka folur për të ardhmen e tij nga grumbullimi me kombëtaren norvegjeze në Marbeja.

Sulmuesi i Dortmundit, i cili po monitorohet nga Real Madrid, Barcelona dhe gjigandë të tjerë Europianë, tha se nuk është ky momenti i duhur për të marrë vendime për të ardhmen, shkruan Football24 News.

”Kam ende edhe 3 vite kontratë dhe nuk jam i shqetësuar për këtë”, u shpreh ai.

Së bashku me Mbapenë, i riu është në rrugën për t’u bërë ylli i ardhshëm i futbollit europian gjatë dekadës së ardhshme. Megjithatë, ai tregohet modest kur flitet për Ronaldon dhe Mesin: “Ata janë ende shumë larg”.

Haland vijoi formën e tij fantastike edhe në fundjavë, me dopietën ndaj Këlnit, por Dortmundi nuk shkoi më tepër se një barazim 2-2.

I pakënaqur nga loja e skuadrës, ai hyri i zemëruar në tunel, pasi i flaku fanellën lojtarit spanjoll Horge Mere. Mere, i cili i kishte kërkuar atij fanellën, nuk mori as një shtrëngim duarsh.

“Isha shumë i zemëruar pas ndeshjes, bëra një gjest të gabuar duke i hedhur fanellën lojtarit që e kërkoi dhe i kërkoj ndjesë për këtë”, tha Haland.