Brukseli u përgjigjet akuzave të Ramës: Nuk ndërhyjmë në fushatë

Komisioni Europian i është përgjigjur kryeministrit Edi Rama, i cili kërkoi reagim urgjent pas video-konferencës së komisioneres Maria Gabriel me kryedemokratin Lulzim Basha.

Në një reagim për Euronews Albania, zëdhënësja e Komisionit Europian, Ana Pisonero shprehet se pjesëmarrja e komisioneres ishte e kufizuar vetëm në dhënien e një fjalimi kryesor.

“Komisioni nuk komenton mbi komentet e palëve të treta. Lutemi të keni parasysh që Komisionerja Mariya Gabriel mori pjesë në Tryezën e 18-të Rrumbullakët mbi Arsimimin, me ftesë të Universitetit Modul të Vjenës, i cili është organizatori i këtij eventi. Pjesëmarrja e komisioneres ishte e kufizuar vetëm në dhënien e një fjalimi kryesor”, tha zëdhënësja e KE.

“Fjalimi, i cili është i publikuar në faqen e internetit të Komisionit, është i fokusuar mbi iniciativat e fundit evropiane në fushën e arsimimit dhe të kërkimit, të cilat vlejnë për të gjithë rajonin e Ballkanit Perëndimor, përfshirë Shqipërinë. Komisionerja nuk bëri ndonjë deklaratë për ndonjë parti politike, por mbajti një fjalim mbi çështjet që kishin të bënin me fushën e saj”, thuhet në reagim.