Kreu i PD, Lulzim Basha, përsëriti edhe njëherë akuzat përse me projektin e Unazës së Re, po bëhet një mega-aferë korruptive. Ai iu kundërvu Ramës, duke e akuzuar se me “diarrenë” e akuzave, po kërkon të mbrojtë këtë akt korruptiv. Basha po ashtu ka ironizuar edhe deklaratën e dhënë sot nga Rama, ku tha se 24-vjeçarja mund të ishte dëshmorja e parë police e rënë në krye të detyrës, nëse nuk do të kishte vepruar me shpejtësi për të hequr kapsollën. Kryedemokrati i është kthyer kryeministrit, duke i thënë se do që ta bëjë policen dëshmore për karrigen e vetë, dhe se po shet Shqipërinë.
Deklarata
“Rama është shfaqur para shqiptarëve, duke sulmuar këdo. Kërkon t’u rrëmbejë pronën banorëve dhe të përfitojë nga megaafera 40 mln euro. Është i obsesionuar të mbrojë marrëveshjen që ka lidhur për të vjedhur 40 mln euro, ndaj po burgos qytetarë të pafajshëm, nëna e fëmijë.
Flet nga mëngjesi në darkë për karrigen e tij, për tepsinë e tij është gati të flakë në rrugë qindra familje pa strehë. Po përdor policinë si burracak, duke vendosur vajza të pambrojtuara në rresht të parë. I përdor me propagandë dhe do t’i bëjë dëshmore me zor. Do të pëlqente ta bëjë dëshmore me zor o plehrë, me siguri mezi po pret o i sëmurë. Ajo nuk do ishte në radhë të parë të protestës, nëse do kishe një polici të trajnuar”, u shpreh Basha.
Ai e akuzoi kryeministrin, se po shet Shqipërinë, duke i bërë thirrje të tërhiqet nga afera korruptive e Unazës. “Kështu e mbajte mandatin e parë, i bërë kriminelët biznesmenë dhe kështu do ti bësh gratë e vajzat dëshmore për karrigen tënde o i çmendur, o i sëmurë. Për para po shet Shqipërinë. Tërhiqu nga afera korruptive e Unazës.
Asnjë centimetër nuk do përparosh. Do jemi aty për të penguar ty, dhe së shpejti do marrësh atë që meriton. Ndal dhunimit të nënave, ndal dhunimit barbar. I bëj thirrje autoriteteve të verifikojnë torturat njerëzore. Nuk ka për të përfunduar me kaq Edi Rama. Nuk ke për t’i marrë ato 40 mln euro. Kjo është vija e kuqe për ty dhe çdo shqiptar. Zmbrapsu dhe mendohu mirë. I bëj thirrje çdo polici dhe policeje të mos përballet me motrat e vëllezërit e tyre, por të bëhen pjesë e qëndresës”, deklaroi kreu i PD.
