Një ditë më parë, zyrtarët nga qeveria shqiptare dhe ajo kosovare u mblodhën në Pejë, për një diskutim të përbashkët dhe e mbyllën mbledhjen me një foto, e cila është komentuar gjerësisht. Në foton në fjalë, të gjithë pozojnë me shqiponjën në duar, përveç zv.kryeministrit Enver Hoxhaj, që hasi ca vështirësi.
Por a e dini se kush ka qënë nismëtarja e parë e shqiponjës me duar? Gjithçka nisi në vitin 1994, në Festivalin e Këngës.
E ftuar në “Tour de Cool”, këngëtarja Edona Llalloshi konfirmoi se ka qenë artistja e parë që ka bërë shqiponjën me duar në skenë, falë këshillës që i ati i dha para se të performonte.
“E them publikisht që kjo ka qenë ideja e babait tim. Unë isha garuese, ndër më të mirat në “Festivalin e Këngës”, në vitin 1994. Në atë kohë ishim të etur për Shqipërinë. Babi më tha, ‘kur të dalësh të këndosh, nxirri duart kështu dhe trego dashurinë që kemi ne për Shqipërinë për flamurin kombëtar’. Nuk e kemi marrë prej askujt dhe pastaj filloi të përhapej”.
https://www.youtube.com/watch?v=MHKLMuyGUrk
Pasi performoi në Shqipëri, Edona u kthye në lagjen e saj në Prishtinë, me shumicë serbe. Siç tregon ajo, nuk ishte e thjeshtë të ktheheshe pas një veprimi të tillë. Madje, ajo dhe familja e saj janë kërcënuar. Figura të njohura në botë, si Rita Ora apo Dua Lipa e jo vetëm, e dëshmojnë se janë shqiptare përmes këtij simboli.
