Kreu i Shtetit, Ilir Meta, ka analizuar katër pikat më kryesore, siç ai i cilëson nga raporti i Komisionit të Venecias, për emërimet në Gjykatën Kushtetuese.
Në deklaratën për mediat, presidenti ka cituar gjetjet që ka bërë Komisioni i Venecias në lidhje me draft-opinionin për çështjen e emërimeve në Gjykatën Kushtetuese, ku ka cituar pikat kryesore, që sipas tij, i japin të drejtë.
Për Metën, ‘Venecia’ konfirmoi që ai kishte të drejtë, dhe se përgjegjës kryesor për ngërçin procedurial ka qenë Ardian Dvorani.
“Fundjava që lamë pas, pati zhvillime të rëndësishme. Nisa këtë javë me kryenegociatorin Zef Mazi.
Për këtë takim, jeni njohur nga zyra jonë. Nuk do t’ju marr shumë kohë, sepse e di që qytetarët janë lodhur me Venecian. Por unë kërkoj vetëm tre minuta përqendrim.
Sipas Venecias, jo sipas presidentit, se cilat kanë qenë raportet dhe qëndrimet në raport me Kishtetutën. Në radhë të parë, Komisioni i Venecias konfirmoi se shkak i përplasjes ishin veprimet antiligjore të Dvoranit dhe mënyrës së dërgimit të listave prej tij.
Përgjegjësia e tij është e provuar. Ja çfarë thuhet në pikën 92: Çështja më problematike e shkaktuar nga veprimet e KED, ka të bëjë me kohën e përcjelljes së listave dhe shkaktoi incident të rëndë procedurial, dhe nuk u diskutua në KED. KED nuk funksionoi në mënyrë transparente”.
