E bujshme/ Milani kërkon Gjimshitin për 15 milionë euro

Nuk është hera e parë, por nuk mund të jetë as e fundit. Milani po mendon seriozisht për Berat Gjimshitin.

Lajmin e kanë bërë të ditur mediat italiane të cilat flasin për një këmbëngulje të drejtorit Maldini për shërbimet e mbrojtësit shqiptar. Interesi i “Djallit” ka ardhur në rritje, sidomos pas dëmtimit të Mohamed Simakanit që ishte objektivi i deklaruar për këtë merkato dimri.

Francezi i Strasburgut ka pësuar një dëmtim që do ta mbajë larg fushave për të paktën dy muaj dhe kjo ndërlikon ndjeshëm planet e Milanit për t’u përforcuar me mbrojtësin që së bashku me Kalulunë duhej t’i jepte frymëmarrje Romanjolit dhe Kjaerit.

Oferta e Milanit mund të joshë Gjimshitin që ka një kontratë deri në vitin 2023 me klubin aktual. Ai vlen 15 milionë euro, praktikisht e njëjta shumë që Maldini do të paguante për Simakanin. Kjo do të thotë që paratë nuk mungojnë, ndaj duhet gjetur akordi me homologët e Atalantës.