Një deklaratë e fortë ka ardhur sot në mbrëmje nga presidenti Meta, sa i takon çështjes së ish-ministrit Tahiri. Ai ka qënë mjaft i drejtëpërdrejtë dhe madje ka ashpërsuar tonet kur është folur për Tahirin, në emisionin “Fakt”. Sipas tij, Tahiri mbyti me drogë jo vetëm Shqipërinë, por gjithë Europën.
“Nuk mund ti shmangem të gjithë pyetjeve tuaja. Por ç’koment mund të kem unë për një delikuent, që mbyti me drogë jo vetëm Shqipërinë, por gjithë Europën”.
Meta është shprehur se nuk do ta kishte bërë kurrë Ministër të Brendshëm një person të tillë. Por sipas tij, ai e mori këtë post falë kryeministrit.
“Nuk dëshiroj të vazhdoj më me këtë çështje. Besoj se e dhashë një përgjigje shteruese, e cila nuk më shkarkon dhe mua nga përgjegjësia për të kaluarën time.
Një nga përgjegjësitë e mia është që një person i tillë, nuk duhet të ishte bërë kurrë Ministër i Brendshëm. Dhe unë e kisha të gjithë mundësinë. Por me këmbënguljen e kryeministrit, ai u bë Ministër i Brendshëm.
Kjo nuk është fare e vërtetë, e dinë vetë ata pse e kanë shkarkuar”, u shpreh Meta.
