Shoqata e Infermierëve Lezhë ka bërë me dije se kanë dalë përgjigjet e analizave për stafin e spitalit rajonal të Lezhës, të cilët u dyshuan se mund të ishin prekur me koronavirus.
Përmes një postimi në Facebook, Shoqata e Infermierëve bën me dije se i gjithë personeli i spitalit ka rezultuar negativ nga virusi Covid-19.
“Lajm i mirë për të gjithë personelin e spitalit Lezhë, që rezultoi negativ në testin e bërë për Covid-19. Zoti ju ruajt dhe mirënjohje pafund për punën tuaj humane dhe me vlera jetësore. Kam ndjerë këto dy ditë çdo shqetësim tuajin në mesazhet që më keni bërë, e s’mundem dot pa gëzuar për secilin prej jush si të isha dhe unë në mesin tuaj”, thuhet në postimin e tyre në Facebook.
Stafi dyshohej se mund të ishte infektuar nga një paciente, e cila ndodhej e shtruar në këtë repart dhe që kishte kryer dhe një ndërhyrje kirurgjikale.
Ajo rezultoi më vonë e prekur nga koronavirusi, duke ngritur kështu dyshimet se mund të kishte prekur edhe personelin me të cilin kishte pasur kontakt.
Deri më tani në Lezhë janë konfirmuar 4 raste me koronavirus.
