Sekuestrohen 196 karta identiteti italiane të cilat rezultojnë se janë vjedhur. Në lidhje me këtë rast, policia kufitare ka vënë në pranga dy shqiptarë, që ishin shoferë të linjës nga Shqipëria në Itali.
Autobusi pa pasagjerë po udhëtonte nga Bari drejt portit të Durrësit, ndërsa kartat e identitetit u gjetën në një vend të fshehur pranë shoferit.
Sipas mediave italiane kartat rezultojnë të jenë vjedhur që në dhjetor të vitit 2015 në komunën e Piancenzës. Shqiptarët e arrestuar thanë për autoritetet se pako me karta u është dorëzuar nga një shtetas italian të cilit nuk i dinë identitetin. Mësohet se kartat ishin të bardha dhe të paplotësuara.
Ndërkohë mediat italiane shprehen se kartat e identitetit italiane do të përdoreshin nga rrjetet kriminale për të trafikuar njerëz nga Shqipëria në Itali.
