Skënderbeu ka mposhtur për herë të dytë Partizanin në kampionat, por këtë herë në “Selman Stërmasi”. Të kuqtë ishin mposhtur në ndeshjen e parë dhe më pas nuk e kishin harruar shijen e humbjes, por janë sërish kampionët në fuqi që i mposhtin. 2 me 0 në favor të korçarëve ka përfunduar sfida në “Selman Stërmasi”.
Ishte pikërisht ish-sulmuesi i të kuqve ai që ka shënuar golin e parë të takimit në minutën e 64’, për të shkatërruar shfaqen shumë pozitive të Partizanit, jo vetëm në këtë përballje, por në të gjithë fazën e parë.
Pikërisht atëherë kur Partizani ishte hedhur i gjithi në sulm, në kërkim të golit të barazimit, ishte Bregu ai që ka vendosur rezultatin final në shifrat 0-2. Dy gola dhe 3 pikë që nga ana tjetër i kanë dhuruar Skënderbeut kreun e klasifikimit, që tashmë në kuotën e 23 pikëve e mban me 1 pikë epërsi ndaj të kuqve.
Supersfida që mbylli javën e 10-të të kampionatit të Kategorisë Superiore, nuk ka zhgënjyer si në fushë, ashtu edhe në shkallët e stadiumit. Një ndeshje shumë e luftuar, mes kujdesit për të mos pësuar, por edhe dëshirës për të bërë diferencën, në të cilën Partizani është shfaqur relativisht superior, të paktën me rastet për shënim, në dispozicion. Gjithsesi, futbolli triumfon mbi të gjitha rregullat dhe ligjet matematikore.
