Dy shqiptarët nga Peja, 17-vjeçarja Mrika Nikçi, dhe babai i saj, Arianit Nikçi, vijojnë aventurën e ngjitjes së majave më të larta në botë, duke shkruar historinë me ngjitjen e shtatë majave më të larta në shtatë kontinentet.
Vetëm pak muaj më parë, dy shqiptarët ngjitën majën më të lartë në botë, Everestin, ndërsa këtë radhë ata janë ngjitur në majën e Carstensz Pyramide, në Indonezi, në një lartësi prej 4884 metra.
Ata janë ngjitur sot në orën 09:45 me kohën lokale, duke kompletuar kështu ngjitjen e shtatë majave të shtatë kontinenteve të botës. Në këtë mënyrë, 17-vjeçarja sapo ka bërë historinë, duke thyer rekordin botëror dhe duke u bërë femra më e re në botë që ngjit majat më të larta në shtatë kontinentet e botës. Këtë sukses të jashtëzakonshëm ajo e ka arritur në moshën 17-vjeçare, duke u bërë ylli më i ri alpinist në botë.
