Mbrëmjen e së enjtes, dy vëllezër u ekzekutuan me armë zjarri kallashnikov në fshatin Gramëz të Krujës. Viktimat janë Gramoz dhe Xhentil Bardhi, 34 dhe 24-vjeç. Dy vëllezërit u qëlluan me kallashnikov, ndërsa ndërruan jetë rrugës për në Spitalin e Traumës.
Si ndodhi ngjarja?
Pas sherrit që nisi në lokalin e fshatit, autori u zuri pritë pranë shtëpisë, duke i qëlluar me breshëri. Krimi ka ndodhur rreth orës 22:25, e ndërsa policia ka identifikuar autorin, bashkëfshatar i viktimave, Roland Pula 32-vjeç, për kapjen e të cilit u angazhuan edhe Forcat e Ndërhyrjes së Shpejtë të Tiranës dhe 2 dronë.
Policia gjeti të braktisur pranë pompave të ujit në fshat, makinën e autorit, ku shumë afër ka edhe banesën, ndërsa vijon krehja e zonës për të bërë të mundur arrestimin e 32-vjeçarit.
Kush është shkaku për marrjen e jetës së dy vëllezërve?
Aktualisht po hetohet në dy pista. Një dekadë më parë, vëllai i dytë i viktimave plagosi me thikë xhaxhanë e autorit. Për krimin, ai kreu dënimin dhe doli nga burgu. Një tjetër pistë lidhet me dyshimet se dy palët kanë bashkëpunuar në disa vjedhje me dhunë dhe kultivimin e drogës. Prishja e pazareve ka sjellë konfliktet mes njëri-tjetrit, duke bërë që ngjarja të shkojë deri në përdorimin e armës.
