Kukësi ka arritur të triumfojë me përmbysje në miqësoren e dytë të organizuar në Turqi përballë Bursaspor. Kjo ishte ndeshja e dytë nën drejtimin e trajnerit të ri Peter Pacult dhe fitoja e dytë për të, pasi në të parën fitoi kundër Kayserispor me të njëjtin rezultat 2-1.
Ishin vendasit që kaluan të parët në avantazh falë ekzekutimit perfekt të një goditje dënimi nga kapiteni, Paul Martin Batalla, në minutën e 33’. Kjo zgjoi Kukësin, që u përpoq që në pjesën e parë të barazonte shifrat.
Në të dytën do të vinte goli i baraspeshës. Imami nga e djathtë krosoi në zonë dhe topi i sulmuar nga Bakaj përfundoi në rrjetë, por sulmuesi nuk e preku atë. Gjashtë minuta më vonë Shkodra shfrytëzoi një kundërsulm të skuadrës së tij dhe i vetëm me portierin kundërshtar realizoi golin e fitores.
Bursaspori pretendoi pak minuta më pas për një penallti, por nuk mendoi ashtu gjyqtari kryesor i takimit. Kukësi e mbrojti avantazhin, madje u pa të dilte shpesh në sulm, por rezultatin përfundimtar i regjistruar ishte 1-2 në favor të kampionëve në fuqi.
Bursaspor – Kukësi 1-2
Shënues: Paul Martin Batalla 33’ / Imami 64’, Shkodra 70’
