Partizani ka shënuar një fitore mjaft të rëndësishme në javën e gjashtë të Superligës, ku përballë Luftëtarit arrin të fitojë 2-0. Një fitore që i largon të kuqtë nga fundi i klasifikimit dhe të bën të mendosh se partizani është rikthyer. Është Sukaj që shënon që në pjesën e parë dhe rikonfirmohet si bomber i ekipit dhe në pjesën e dytë Trashi realizon një gol mjaft të bukur me kokë. Ka qenë crogni që ka asistuar në të dy rastet e shënimit të golave, duke u kthyer edhe në njeriun e ndeshjes. Duket se ekipi po fillon ta transmetojë në fushë atë çfarë ka në mendje Mark Iuliano për stilin e lojës dhe mënyrën si do të interpretohen ndeshjet për të kthyer një Partizan fitues.
Nga një gol në secilën pjesë të takimit kanë qenë mëse të mjaftueshme për të siguruar fitoren e dytë të të kuqve në këtë sezon, për më tepër të njëpasnjëshme. Ishte Xhevahir Sukaj ai që kaloi Partizanin në avantazh në minutën e 28’, duke devijuar drejt rrjetës një top të krosuar nga Progni. Ky i fundit, ishte ndërkohë protagonist kryesor edhe në golin e dytë të të kuqve, duke shërbyer në zonë për Trashin që me një goditje me kokë dërgon topin në rrjetën e portës së gjirokastritëve, për të vulosur kështu rezultatin përfundimtar. E pamundur për të reaguar ka qenë skuadra e Luftëtarit, madje duke mos arritur dot të përfitojë as nga dalja e Krasniqit me karton të kuq në të 79’, teksa të kuqtë e kanë mbyllur me 10 futbollistë në fushë.
Partizani – Luftëtari 2-0
Shënues: Sukaj 28’, Trashi 71’
Partizani: Hoxha; Progni, Krasniqi, Malota, Kalari, Adorjan, Batha, Vila, Trashi, Herrera, Sukaj.
Trajner: Mark Iuliano
Luftëtari: Ruçi, Toledo, Beqiri, Rapa, Rapo, Aleksi, Ramadani, Abazaj, Brahimaj, Bregu, Rroca.
Trajner: Luis Curbelo
Gjyqtar: Enea Jorgji
Karton i kuq: Gëzim Krasniqi
