Një 52-vjeçar është gjetur i plagosur nga kalimtarët në Durrës, ndërsa ndodhej në trotuar i shtrirë dhe mbuluar nga gjaku. Qytetarët pasi kanë lajmëruar ambulancën, e kanë dërguar me urgjencë në spital, në gjendje të rendë.
Plagosja ka ndodhur rreth orës 20:50, në lagjen Nr.18, në afërsi të stadiumit “Niko Dovana”. Burime zyrtare nga policia thanë se bëhet fjalë për shtetasin me inicialet S.Dh., i cili ndodhet në Spitalin Rajonal Durrës, nën kujdesin e mjekëve. Ngjarja dyshohet se ka ndodhur për motive të dobëta, dhe viktima është qëlluar me thikë.
Njoftimi i policisë Durrës:
Plagos me thikë një shtetas. Arrestohet pak minuta pas ngjarjes autori i dyshuar. Më datë 02.08.2018, rreth orës 20:50, në lagjen Nr.18, për motive të dobëta është goditur me thikë shtetasi S.Dh., 52-vjeç, banues në Durrës, i cili ndodhet në Spitalin Rajonal Durrës, nën kujdesin e mjekëve.
Me të marrë njoftimin, janë organizuar menjëherë Shërbimet e Policisë së Durrësit, të cilët kanë bërë të mundur identifikimin dhe kapjen e autorit të dyshuar, shtetasin B.Xh., 36-vjeç, banues në Durrës.
Gjithashtu në cilësinë e provës materiale është sekuestruar thika. Grupi hetimor po punon për sqarimin e plotë të ngjarjes.
