Kryeministri Edi Rama e konsideroi “lajthitje në një proces tranzicioni” faktin që Lëvizja Vetëvendosje, nën drejtimin e Albin Kurtit, ka hapur një degë edhe në Tiranë.
Për të plotësuar qëndrimin e tij sa i përket zgjerimit të “VV”-së edhe në Shqipëri, kreu i qeverisë deklaroi gjatë një interviste dhënë për “Top Channel”, se duhet njëfarë kohe për t’u bërë kryeministër.
“Mendoni për një moment sikur një degë e PS, natyrisht me miratim nga Kryesia dhe nga unë, të bëjë protestë në ditën e pavarësisë së Kosovës dhe të thotë nuk është koha për të festuar, por për të reflektuar, dhe të bëjë një fletërrufe, që duket sikur është nxjerrë nga printerët e opozitës me qeverinë e Kosovës, çfarë do të mendonin njerëzit?
Unë e konsideroj një lajthitje në një proces tranzicioni nga opozita në qeverisje, në një vakum, ku kam qenë edhe vetë dhe duhet njëfarë kohe për të bërë kryeministrin. Sepse kryeministër zgjidhesh ditën kur fillon, por bëhesh me kalimin e kohës”, nënvizoi Rama.
