Teksa të gjithë këshillojnë për tu mbrojtur nga koronavirusi, nga ana tjetër kërkohen vullnetarë që të infektohen, për t’iu ardhur në ndihmë shkencëtarëve. Mos u çudisni!
Madje infektimi është kundrejt pagesës. 3 500 stërlina është çmimi i vënë për këdo që pranon në mënyrë vullnetare të infektohet me koronavirus, dhe të ndihmojë shkencëtarët për të gjetur një vaksinë.
Vullnetarët e parë kanë ardhur, dhe bëhet fjalë për 24 persona. Një qendër shkencore në Londër ka arritur të rekrutojë deri tani 24 vullnetarë, sipas raportimeve të ‘Daily Mail’.
Ata do të infektohen me variantin më të dobët të virusit, që deri tani ka vrarë më shumë se 3800 persona në të gjithë botën, duke u shkaktuar atyre simptoma të ngjashme në frymëmarrje. Më pas do të testohet një mjekim që është krijuar nga shoqëria Hvivo.
Sikundër procedohet normalisht, pacientët do të qëndrojnë në karantinë për dy javë, për të parë nëse mjekimi ka sukses.
Rreth 35 vaksina të tjera janë në fazë zhvillimi, dhe qeveria e Mbretërisë së Bashkuar ka premtuar 46 milion stërlina të tjera, për betejën kundër koronavirusit.
