UPDATE/ Pas sekuestrimit të drogës që ndodhej në një furgon në Velipojë, kanë dalë detaje të reja lidhur me këtë operacion.
Mes të arrestuarve, është edhe një oficer policie, i cili dyshohet se kishte dalë garant për transportin e drogës.
Efektivi i arrestuar është Prel (Enriko) Zylja, vëlla i zëvendës shefit të kufirit në Shkodër, Ndrek Zylja.
Zyla u arrestua është kryer gjatë aksionit ku u sekuestruan mbi 1 ton kanabis në Vilun të Velipojës pranë Plazhit. Dyshohet se droga do ngarkohej në një gomone për t’u trafikuar drejt Italisë.
Kryeministri Edi Rama, prej kohësh e ka shfaqur luftën kundër kanabisit si një ndër sukseset e qeverisë Rama.
“Shqipëria është çkanabizuar, viti 2017 është vit i suksesit në luftën për nxjerrjen e vendit tona nga lista e vendeve të kanalizuara”, kështu është shprehur kryeministri Rama. Megjithatë, duket se këto deklarata janë thjesht retorikë e kreut të qeverisë, teksa duket se droga nuk ka të sosur në vendin tonë.
Kështu, pas kapjes së Habilajve u kapën 4.5 tonë drogë në fshatin Babicë të Vlorës. Ndërkohë, në orët e vona të mbrëmjes së djeshme është sekuestruar një sasi e madhe droge në fshatin Vilun të Velipojës, e cila mendohet se është rreth 1 ton.
Zona e Vilunit ishte pika nga ku transportohej droga me skafe drejt Italisë. Policia ka arrestuar disa persona, ndërsa nuk dihen detaje mbi identitetin e të arrestuarve./ Tirana Today
