Kryetari i Bashkisë së Vlorës, Dritan Leli është thirrur në një ballafaqim publik nga anëtarët e Këshillit Bashkiak. Përballja do të bëhej në Teatrin e qytetit, por Leli nuk e ka mirëpritur pasi mbledhja do të jetë në shkelje me rregullat anti-Covid.
Mbledhja është kërkuar nga vetë Këshilli Bashkiak, ku njofton se do të mbahet në Teatrin “Petro Marko”. Sot pritet që të kulmojë debati i ndezur prej kohësh mes socialistëve dhe Dritan Lelit, ku kryebashkiaku është thirrur në një ballafaqim publik nga anëtarët e Këshillit Bashkiak.
Ja se çfarë shkruan Leli në një postim në Facebook:
“Lidhur me mbledhjen e ditës së sotshme kërkuar nga një grup këshilltarësh bashkiak, më poshtë do të gjeni të gjithë komunikimin zyrtar që kam zhvilluar me Këshillin Bashkiak, për mbledhjen e kërkuar prej tyre për t’u zhvilluar në teatrin “Petro Marko”.
Referuar ligjit për parandalimin dhe luftimin e infeksioneve, kemi vendosur që mbledhja të zhvillohet online, në aplikacionin Zoom, siç janë zhvilluar të gjitha mbledhjet e deritanishme përgjatë gjithë vitit”.
