Një sasi droge është sekuestruar ditën e sorme në Portin e Durrësit, në një ngarkesë me banane që vinte nga Ekuadori. Sipas njoftimit zyrtar nga autoritetet policore, bëhet me dije se janë zbuluar 14 pako me peshë 11 kg e 650 gram kokainë.
Pakot ishin të fshehura brenda trupit të kontejnerit, si porosi e kompanisë “Alba Ekzotik Fruits.” Në lidhje me sasinë e drogës së sekuestruar është arrestuar Barjon Gumeni, vëllai nga nëna i Eduart Dautit, administratori i kompanisë “Alba Exotic Fruit”. Ndërkohë, personi i dytë i ndaluar, juristi i kompanisë, u la i lirë.
Kontejneri është nisur nga Ekuadori në datë 26 maj, dhe në total ka ndaluar në 5 porte. Ndalesa e parë pas nisjes është në Guayaquil të Ekuadorit në orën 02:47 të 27 majit. Aty ka qëndruar për 2 ditë dhe më pas mëngjesin e 29 majit është nisur drejt Marokut të Afrikës së Veriut.
Edhe në këtë ndalesë, kontejneri ka qëndruar për një kohë relativisht të gjatë, nga data 16-24 qershor. Nga Maroku, kontejneri ka udhëtuar drejt portit të Greqisë për të mbërritur më pas në Portin e Durrësit.
Kompania “Alba Exotic Fruit” rezulton e përmendur edhe më parë për trafik droge, ku në vitin 2019, në kontejnerët e kësaj kompanie, në Pire të Greqisë u gjetën 137 kg kokainë që u zëvendësua me oriz me GPS nga autoritetet.
