Drejtori i Policisë Rrugore, Mithat Tola, po jepte një intervistë për mediat në rrugë, në autostradën Tiranë-Durrës, kur në ato çaste ka ndodhur një aksident rrugor.
Aty janë përplasur dy automjete me njëra-tjetrën, por fatmirësisht nuk ka pasur të lënduar, por vetëm dëme të vogla materiale.
Në atë moment, drejtori i Policisë Rrugore ka kthyer kokën pas, dhe i ka bërë thirrje shoferëve të respektojnë rregullat e qarkullimit rrugor për të mos u bërë shkak aksidentesh.
Ai tha për mediat se policia ka marrë masat që të garantojë lëvizje sa më pak probleme për të gjithë ata qytetarë, që udhëtojnë drejt destinacioneve turistike.
“Sezoni ka filluar tashmë, edhe ne kemi filluar herët me masat përgatitore, që në muajt prill-maj. Policia rrugore është e vendosur në të gjithë akset rrugore, kryesisht në zonat turistike. Jemi të përqëndruar dhe kemi shërbime shtesë. Monitorojnë trafikun, ndërhyjmë për zhbllokimin e tij dhe bëjmë kujdes që drejtuesit të mos i shkelin rregullat”, tha ai.
Ndër shkeljet më të shpeshta gjatë këtyre kohëve, Tola renditi shpejtësinë, konsumimin e alkoolit.
Ai tha ndër të tjera, se një risi e këtij sezoni ka qenë edhe dërgimi i gjobave në adresën e shkelësit.
“Ka filluar të bjërë numri i masave me ndalim. Janë rritur masat e gjobave në mungesë, që tani i dërgojmë me postë në shtëpinë e qytetarëve”.
