Eksperti i kriminalistikës, Ervin Karamuço, ka deklaruar se ngjarja e ditës së djeshme në Shkodër, ku Suida Kukës iu tentua t’i bëhej atentat me tritol, u parandalua nga ata që e planifikuan.
I ftuar në studion e “ABC Live”, Karamuço tha se duke iu referuar burimeve nga hetimi, ngjarja është parandaluar nga vetë autorët, për arsye që ende nuk dihen. Duket se ka pasur një pendesë në moment të fundit, dhe Kuka ka marrë një telefonatë, ku i është thënë për tritolin e vendosur poshtë mjetit të saj.
“Ngjarjen e parandaluan ata që e kishin planifikuar. Dje kam marrë në telefon drejtues të policisë. Kam pyetur nëse ka qenë një çantë e hedhur bosh, eksploziv me fitil apo telekomandë. Më është konfirmuar se ka qenë me telekomandë.
Në momentin e fundit, dikush, a një grup i caktuar njerëzish kanë ndërruar mendje dhe atëherë është bërë një telefonatë duke i thënë se e ke poshtë makinës dhe ajo ka njoftuar policinë, ku janë marrë masat.
Para dy javësh, kemi diskutuar që krimi i organizuar ka ngritur dorë kundër shtetit. U provua me policët. Tani vijmë edhe në disa sektorë të tjerë siç është ky i shëndetësisë”, theksoi Karamuço.
Drejtoresha e Operatorit të Kujdesit Shëndetësor në Shkodër është paralajmëruar. Burime pranë policisë së Shkodrës bëjnë me dije se Suida Kuka ka marrë një mesazh në telefonin e saj, nga një numër i panjohur ku është njoftuar për lëndën plasëse në mjetin e saj. Menjëherë pas këtij mesazhi ajo ka marrë në telefon forcat e policisë së Shkodrës, të cilët kanë rrethuar zonën dhe kanë kërkuar evakuimin e të gjithë institucionit. Në dëshminë në polici ajo ka deklaruar se nuk ka konflikte me persona te tjerë, ndërkohë që edhe sa i takon detyrës si titullare e institucionit nuk ka pasur konflikte apo presione. Sakaq, policia e Shkodrës dhe Prokuroria po hetojnë edhe në lidhje me tabulatet telefonike dhe po kërkohet gjurmimi i numrit që dërgoi mesazhin.
