Redaksia e Tirana Today udhëtoi drejt Tepelenës, në fshatin Kalivaç, për tu takuar me familjen Nelaj.
Na pret Barjami, burri i shtëpisë, i cili na drejton për tek Lumturia, që në krahë mban Shanikon e vogël. Është vetëm 6 vjeçe, por jetesa po e rëndon shumë. Kur ishte 3 muajshe, prindërit zbuluan se ajo vuan nga talasemia, e prej atëherë sëmundja po e vë përtokë.
“Doktorët më kanë thënë që nëse vazhdon kurën në datën që ka, do të ketë përmirësime. Por, unë nuk e çoj dot në atë datë. Nga katër herë në muaj, unë e çoj 2 herë. Mua më shkon rruga vajtje-ardhje me gjithë shpenzimet, 60 mijë lekë.”
Varfëria e tejskajshme dhe largësia, bën që Shaniko të marrë gjak njëherë në dy muaj. Duke shkuar në gjendje të rënduar.
Familja Nelaj jeton në një dhomë të rrënuar. Ronaldo, djali i madh vuan nga probleme të shëndetit mendor, ndërkohë Adriani me këpucët e grisura niset çdo ditë për në shkollë, shkruan Tirana Today.
“Kushtet e mija këto janë, çfarë bie jashtë, bie brenda. Shumë herë qëndrojmë edhe pa bukë. Qan fëmija, e kërkon të hajë, qan fëmijë dhe vjen e thotë se pse nuk jemi dhe ne si të tjerët.”
Barjami kërkon të ulërijë, por edhe për këtë është i pafuqishëm. Me dhimbjen e një babai, ai çdo ditë vuan sytë dhe heshtjen e mundur të tre fëmijëve.
“Të ikja, të mbyllja sytë e të mos shihja gjë, unë nuk di më çfarë të bëj”- thotë Barjami me zërin e mekur.
E frikëson e tashmja, por më tepër i trembet të ardhmes. Çfarë do të ndodhë me fëmijët e tij, a do të ketë gjak për Shanikon, a do të rritet dot edhe ajo si fëmijët e tjerë? Po, me dy djemtë e tjerë, çfarë do të bëhet? Me çdo ditë që kalon, ai vazhdon të jetë po njësoj, me shpresën se jeta e fëmijëve do të ndryshoj. Një shpresë që pak nga pak, po venitet. Tirana Today
