Këshilli i Mandateve është shtyrë për ditën e nesërme në orën 10:00. Edhe pse avokati mbrojtës i deputetit Saimir Tahiri kërkoi ditën e hënë si mbledhjen e radhës, kjo është hedhur poshtë nga kryetari i Kuvendit, Gramoz Ruçi. Me gjithë kundërshtitë e opozitës, Ruçi ka vendosur ditën e nesërme si mbledhjen e radhës për të vendosur nëse do t’i hiqet apo mandati deputetit Saimir Tahiri, për t’i hapur rrugën prokurorisë mbi arrestimin e tij si i dyshuar në përfshirjen e trafikut të drogës Shqipëri-Itali.
Ruçi: Duke marrë parasysh kërkesën, është e domosdoshme. Por e hëna është vonë. Deri nesër keni kohë. Nesër në orën 10:00.
Alibeaj: Rregulli e kërkon këtë gjë. Ne duam që të vazhdojmë këtë seancë. Edhe natën do të rrimë këtu. Kjo që po ndodh është fundi i dinjitetit.
Ruçi: Këtu nuk jemi duke marrë një vendim në kundërshtim me procedurat parlamentare, të çdo komisioni parlamentar. Kur fillon dhe mbaron mbledhja e përcakton kryetari i komisionit dhe kryesorja është që kam tabelat që nga 2007 deri më sot dhe këshilli i rregullores nuk është mbyllur vetëm një mbledhje. Vetëm në rastin e Bashës ka zgjatur 60 ditë. E dyta, ne nuk kemi pse ta zvarrisim në kalendat greke këtë gjë siç po thuhet. Ndaj kërkesa për të hënën nuk merret parasysh, mblidhet ditën e nesërme në orën 10:00.
