Një ndër dëshmitë e bashkëngjitura në dosjen e Prokurorisë është edhe ajo e të dashurës së Indrit Çelajt, 26 vjeç, me të cilën ai kishte një vit që bashkëjetonte. Shtetasja Sonila N., është rrëfyer se i dashuri i saj nuk ka pasur konflikte me njeri, përveç një rasti kur u përfshi në aksident. Ajo ka thënë se e njihte Indritin prej shtatë vitesh, por vetëm prej një viti kishte nisur të bashkëjetonte. Po kështu, Sonila ka deklaruar se i ndjeri nuk kishte konflikte me punonjësit e firmës ku punonte, e ndërsa para dy muajsh ka bërë një aksident ku kishte dëmtuar një person me makinën e punës.
“ ‘Shtetasin Indrit Çelaj e njoh që para 7 vitesh dhe kam një vit që bashkëjetoj me këtë shtetas. Ai punonte në montimin e kondicionerëve. Indriti nuk kishte konflikte me punonjësit e firmës ku punonte. Para dy muajsh ka bërë një aksident, dhe kishte dëmtuar një person me makinën e punës. Në lidhje me këtë ngjarje, ai nuk kishte pasur ndonjë problem, por pronari i makinës i kishte kërkuar paratë për dëmin në mjet, dhe Indriti i kishte thënë se nuk kishte para.
Shtetasi Vini Mneri i kishte dërguar Indritit sms duke i thënë: ‘Bëji lekët e makinës, se s’ke hall pa i paguar”, citohet në dosje dëshmia e të dashurës së 26- vjeçarit.
Por, pas pretendimeve të saj është marrë në pyetje edhe personi që ajo përmend në deklarimet e saj, shtetasi Edvin Mneri.
Ky i fundit ka thënë se Indriti para një muaji e kishte aksidentuar me makinën e punës. Ndaj ai i kishte kërkuar që të rregullonte defektin.
“Unë e njoh shtetasin Indrit Çelaj. Ngjarjen e kam mësuar kur më kanë marrë në telefon nga policia, për t’u paraqitur dhe më pas në televizor. Në momentin kur kam qenë në dyqanin tim, kam mësuar se kishin plagosur një teknik kondicionerësh. Indriti para një muaji më ka aksidentuar makinën e punës, dhe i kam kërkuar që të rregullojë defektin, por nuk e ka bërë një gjë të tillë”, citohet në dosje.
