Në përfundim të seancës paraprake për dosjen “Babalja”, Gjykata e Tiranës vendosi të nisë procesin e gjykimit, duke marrë të pandehur ish-deputetin e PD-së Salianji.
Katër të pandehurit, mes tyre ish-deputeti Salianji, kërkuan pushimin e gjykimit, kërkesë e cila nëse do ishte pranuar, do konfirmonte faktin se prokuroria kishte dështuar me hetimet e saj.
Të pandehur janë Ervin Salianji, Fredi Alizoti, Albert Veliu dhe gazetari Jetmir Olldashi, të cilët akuzohen për “kallëzim të rremë”.
Pas vendimit, ka reaguar ashpër kreu i Partisë Demokratike, Lulzim Basha.
Në një dalje publike për mediat, Basha tha se kupola e shtetit është e përfshirë në skandal korruptiv dhe se dëshmitari i rremë Alfred Alizoti ka pranuar të bëjë 1 vit burg, për të mbrojtur kupolën e shtetit në aferat e tyre korruptive.
“Kupola e shtetit është e përfshirë në skandal. Alfred Alizoti ka pranuar të bëjë 1 vit burg për të mbrojtur kupolën e shtetit, e cila është e zhytur deri në fyt në afera korruptive dhe skandale. Deputeti i PD Ervin Salianji ka bërë publike për mediat fakte të rënda sesi Agron Xhafaj bën trafik droge, zbuloi dëshmitarin e rremë Alfred Alizotin, që bën ndere për kupolën e korruptuar të shtetit.
Prokuroria vetëm bën sehir dhe nuk vepron për zyrtarët e lartë e shtetit. Kjo sepse Prokuroria është kapur politikisht. Donika Prela dhe prokurorët e tjerë kanë marrë si të pandehur Salianjin, gazetarin Olldashi dhe denoncuesit e së keqes, e jo keqbërësit.
Sot të pandehur për afera të tmerrshme kriminale shtetërore duhet të ishin Taulant Balla, Fatmir Xhafaj, zyrtarë të SHISH. Edi Rama ka marrë në mbrojtje Ballën, Xhafajn, zyrtarët e lartë të Policisë së Shtetit që dalin në përgjime duke bërë favore për kriminelë me damkë dhe gradohen nga kriminelët”, tha kryetari Basha.
