Ministri i Brendshëm Fatmir Xhafaj ishte sot në Dibër, në kuadër të “Forumit Qytetar për Sigurinë, një hapësirë e re ku llogaridhënia publike e Policisë së Shtetit, ndërthuret me mundësinë e qytetarëve për t’u dëgjuar drejtpërdrejtë nga strukturat e rendit publik?”.
Nga atje ministri u ka bërë thirrje qytetarëve që të gjithë të luaj nga pak rolin e policit pasi, kështu do të mund të kenë një familje, një lagje, një qytet një qark dhe më tej të gjithë vendin të sigurt.
“Unë kam qenë fare i qarte në nisje të këtij procesi, kemi qenë shumë të vendosur.
Reforma të tilla kanë marrë dhe marrin mbështetje edhe nga partnerët ndërkombëtarë.
Punonjësit e policisë janë njerëz që sakrifikojnë dhe që nuk kanë një rrogë kushedi se çfarë, që të jeni të sinqertë. Ata janë qytetarë si ne dhe shpesh punojnë me orë të gjatë dhe nuk paguhen për punën që bëjnë.
Por ata nuk janë gjithçka dhe nuk kanë gjithçka. Sado të fortë që të jenë ata nuk mund t’i përballojnë të gjitha këta fenomene. Çështjet e rendit dhe sigurisë janë përgjegjësi e policisë, por të gjithë bashkë duhet t’i ndihmojmë. Në Angli, në Gjermani, në Zvicër qytetarët janë të parët ata që shqetësohen për rendin dhe sigurinë dhe i adresohen policisë.
Ne e kemi pak problem që t’i themi policisë që ka ndodhur ky krim dhe dyshoj për x apo y. Sepse tek ne të quajnë spiun. Por ky është një mentalitet i ngushtë i shoqërisë tonë. Por, nëse do ta shikoje se ai është një shqetësim për ty dhe do ketë më pak krim.
Ne duam të jemi të angazhuar, dhe po punojmë fort për t’u përballur me këto fenomene. Por, jemi këtu për t’iu lutur ju që duhet të bashkëpunojmë, se cilat janë gjërat që duhet të bëhen më mirë. Kështu do të jemi më të sigurt, dhe kështu do të jemi më të sigurt për të pasur një shoqëri më të sigurt për sot dhe të nesërmen”- tha Xhafaj. TIRANA TODAY
