Administratori i një shkolle private në vend, i cili ditë më parë i shpëtoi një atentati, ka ndryshuar dëshminë e tij e dhënë më herët, ndërsa ka kërkuar mbrojtje. Lulzim Masha, i shpëtoi një atentati në liqenin Artificial, ka kërkuar mbrojtje nga shteti. Ndryshe nga dëshmia paraprake, biznesmeni fillimisht mohoi të ishte objektiv i ndonjë atentati. Gjatë marrjes në pyetje nga hetuesit, ai ka pranuar se një person e ka vëzhguar. Në dëshminë e dhënë përpara grupit hetimor, Masha është shprehur se për gati një javë është ndjekur dhe është mbajtur në vëzhgim nga një person. Sipas tij, këtë person e ka vërejtur pranë shkollës që ai administron, por nuk e kishte menduar se mund të kishte qenë objektiv i ndonjë atentati, pasi nuk ka konflikt me njëri.
Sipas biznesmenit, autori ka qenë i moshës rreth 25 deri në 30 vjeç, i cili ka qenë i veshur me pantallona xhinse, esmer me pak mjekër si dhe mbante veshur një kapele, ngjyrë të zezë. Mes personave që janë marrë në pyetje, përveç dëshmitarëve okularë dhe objektivit, në pyetje është marrë dhe vëllai i këtij të fundit, pasi ai rezulton person me precedent. Vite më parë është dënuar me 15 vite burg për vrasje, dhe hetuesit kanë dyshime se atentati është bërë për hakmarrje. Por deri më tani nuk ka asnjë të dhënë.
