Monedhat kryesore ndërkombëtare kanë regjistruar rritje ndaj valutës vendase, lekut, gjatë ditës së hënë, me përjashtim të euros. Kjo e fundit vijon të qëndrojë në vlera të pandryshuara me ditën e premte, e fiksuar në kuotën e 124.2 lekëve në blerje, dhe 125 lekëve në shitje, vlera që e kanë shoqëruar gjatë pjesës më të madhe të javëve të fundit.
Ndërkohë, dollari është forcuar me plot 0.5 lekë për njësi kundrejt lekut. Valuta amerikane këmbehet sot në pikat e këmbimit valutor për 109.2 lekë.
Luhatja ka qenë më e vogël për sterlinën, e cila u rrit minimalisht me 0.2 lekë për njësi, për të kapur kursin e 140 lekëve në blerje dhe 140.5 lekëve në shitje. Rritja e paundit përkon edhe me lajmin e aprovimit të marrëveshjes Brexit nga krerët e Bashkimit Europian, një ditë më parë.
Sa i takon valutave të tjera, dollari australian është forcuar ndjeshëm ndaj monedhës kombëtare, lekut me 0.6 lekë për njësi, për t’u ngjitur kështu në kuotën e 79.3 lekëve.
Me 0.5 lekë për njësi është rritur edhe dollari kanadez, i cili këmbehet sot për 82.7 lekë në blerje dhe 83.5 lekë në shitje. Ndërkohë, rritja ka qenë më e vogël për frangën zvicerane në raport me ditën e premte, e cila këmbehet sot në tregun valutor për 109.3 lekë./ SCAN
