Parlamenti në Kosovë ka votuar qeverinë e re të kryesuar nga Avdullah Hoti i LDK-së, me 61 vota. Për qeverinë e re të Kosovës votuan 61 deputetë “Pro”, 24 “Kundër” dhe 1 “Abstenim”.
Gjatë seancës, Hoti tregoi edhe përbërjen e ekzekutivit që vjen si rezultat i marrëveshjeve të partive LDK-AAK-Nisma- Lista Serbe.
Por cila ishte marrëveshja e lidhur mes Lidhjes Demokratike të Kosovës dhe Listës Serbe? ‘Klan Kosova’ ka siguruar dokumentin e marrëveshjes mes dy partive, që mban firmat e Isa Mustafës dhe Goran Rakiqit.
Mes pikave të marrëveshjes është se të dyja palët nuk mbështesin mocione mosbesimi që janë inicuar në të kaluarën, edhe parti të tjera në parlament.
Në të përmendet edhe dialogu Kosovë-Serbi i ndërmjetësuar nga BE-ja, ku theksohet nevoja për vazhdimin e tij.
Presidenti Hashim Thaçi përgëzoi deputetët e Kuvendit të Kosovës, për votimin e qeverisë së re. Në një reagim në rrjetet sociale, kreu i shtetit kosovar i uroi suksese qeverisë që do të udhëhiqet nga Avdullah Hoti, i LDK-së dhe ofroi bashkëpunimin e tij për “jetësimin e axhendës kombëtare dhe ndërkombëtare”. Votimi i kësaj të mërkure u përshëndet edhe nga Ambasada Amerikane në Kosovë.
