Koronavirusi do zgjasë deri në 2021. Këto janë parashikimet e frikshme të një dokumenti sekret të hartuar nga Public Health England, (Agjensia e Ministrisë së Shëndetësisë dhe Kujdesit Social të Mbretërisë së Bashkuar), i cili është publikuar nga prestigjiozja “The Guardian”.
Duke iu referuar raportit sekret, thuhet se epidemia e koronavirusit në Britani do të zgjasë deri më pranverën e vitit 2021. Në skenarin më të keq, mund të prekë deri në 80 përqind të popullsisë, nga ku 15 përqind e të prekurve, ose 7.9 milionë njerëz mund të shtrohen në spital për tu kuruar. Ajo çfarë parashikohet është e frikshme.
Dokumenti i cili sqaron se katër në pesë persona të popullsisë “pritet” të infektohen nga virusi, është shkruar për të përgatitur sistemin shëndetësor britanik, për përballjen me koronavirusin.
Një tjetër shqetësim lidhet edhe me përballimin e një emergjence të tillë, dhe sa të aftë janë trupa e mjekëve. Po kështu kapaciteti i sistemit shëndetësor britanik, për të përballuar fluksin e të sëmurëve.
