Të tjera përgjime janë hedhur në dritë sa i takon dosjes së Fatos Tushes. Një gazetar i njohur në Tiranë dhe një politikan me një inicialet “B” janë pjesë e dosjes, ndërkohë që një tjetër fragment zbulohet sot. Ende është mister kush është “B”-ja që përmendet në përgjimet e SPAK-ut që ka 11 zyrtarë dhe biznesmenë deri tani nën akuzë. Në dosje prokuroria i referohet vetëm me inicialin “B”, duke mos shkuar më tej, por që kuptohet që zyrtari në fjalë ka jo pak peshë si në Lushnje, por edhe në Tiranë.
Biznesmeni Ibrahim Lami i cili u arrestua bashkë me Fatos Tushen, thotë se e ka shoqëruar atë për në Parlament. Një tjetër bisedë është zbardhur nga dosja e SPAK, ku “B”-ja flitet për një tjetër bisedë, që është zhvilluar më 28 shtator 2020, ku në fokus është mbyllja e problemeve që mund të hapeshin nga tenderi i kanalit vaditës. Biseda është zhvilluar mes drejtorit të Ndërmarrjes së Pasurive Publike, Flamur Peqini dhe biznesmenit Ibrahim Lamit në lidhje me ankimimin e paraqitur nga firma “Avduli” për tenderin e kanalit. Lami siguron Peqinin se politikani i Parlamentit nuk e lë këtë punë.
Biseda e zbardhur:
Flamur Peqini: Ja çuam përgjigjen që të premten, unë tani, ja qëndisa, ja çova, shohim çfarë do të bëjë ai. Po kush e di tani, ça të them unë.
Ibrahim Lami: Tashi ku ka të drejtë të ankohet ai…A ju vë në dijeni juve ai?
Flamur Peqini: Ankohet aty tani te APP dhe normal na vë në dijeni edhe neve, ai na nis një shkresë dhe ne ai, si rregull nuk bie dakord me përgjigjen ai dhe bën një ankesë te APP.
Ibrahim Lami: E marr vesh, e marr vesh. Po si ky ka burrë i poshtër qenka?
Flamur Peqini: Më të poshtër nuk ke ku të gjesh, por hajt ne e bëmë atë që duhet bërë.
Ibrahim Lami: A e di ti, çfarë halli kam unë, se dikush aty nga brenda ja ka çuar informacion atij.
Flamur Peqini: Jo nga aty jo, por nga ata lart po.
Ibrahim Lami: Nuk e di se një ja ka çuar. Këtë mbaje për vete se ma tha kryetari mua. Do ta gjejë tha, do ti q* nënën, tha.
Flamur Peqini: E di unë e di. Kam edhe një aludim aty lart, ai që ke folur gjithmonë, ai juristi, jo ky, flas për juristin, jo ky se nuk arrin deri në atë fazë ky.
Ibrahim Lami: Se di jo, mirë është të dali se ai këtu le të hajë veten me dhëmbë se nuk e le, “B…..” këtë herë këtë punë.
Kryebashkiaku i Lushnjes, Fatos Tushe ka shpërdoruar detyrën në disa mënyra. Në bazë të hetimeve, për tenderin korruptiv rezulton të jetë përfshirë edhe Komisioni i Prokurimeve Publike. Një prej kompanive humbëse ka paraqitur një ankesë në KPP. Që kjo kërkesë të mos pranohej nga KPP, biznesmeni fitues i tenderit ka kërkuar mbështetjen e kryebashkiakut për të ndërhyrë. Pas kësaj kërkesë nga biznesmeni, Komisioni i Prokurimit Publik, vendosi që të mos e pranonte ankesën e paraqitur nga kompania humbëse. Kur në zyrë ka ardhur një shkresë nga SPAK, punëtorët kishin telefonuar kryebashkiakun. Nga përgjimet mësohet se Tushe kishte bërë gati 20 mbledhje për t’iu lënë porosi punëtorëve se çfarë do të thonin para prokurorëve. Madje juristja në një telefonatë me një prej punonjësve shprehet se nuk kishte asgjë për t’u shqetësuar, pasi kryebashkiaku kishte dalë garant.
