Kryeministri i Suedisë, Stefan Lofven ka paralajmëruar qytetarët e tij, se duhet të përgatiten për mijëra viktima nga koronavirusi.
Në një intervistë për gazetën suedeze, “Dagens Nyheter”, Lofven u shpreh se pandemia e koronavirusit do të vijojë për muaj me radhë.
“Do të numërojmë mijëra viktima. Duhet të përgatitemi për këtë”, tha kreu i qeverisë suedeze.
Suedia numëron deri më tani 358 viktima nga koronavirusi. Në të gjithë vendin janë regjistruar 6,131 raste infektimi. Ndërkohë janë shëruar 205 persona.
Teksa gjithë shtetet e Evropës kanë marrë masa të rrepta për kufizimin e lëvizjeve, Suedia nuk duket të veprojë në të njëjtën mënyrë.
Suedia nuk i ka mbyllur kufijtë, as shkollat apo baret, madje nuk ka ndaluar as grumbullimet me më pak se 500 njerëz.
Qeveria atje ka thënë se populli suedez e do natyrën dhe se mbyllja në karantinë do të shkaktonte dëme të theksuara të shëndetit mendor.
Revista amerikane Bloomberg raporton se “Metoda suedeze e Laissez-Faire është një nga reagimet më të kontestuara ndaj koronavirusit.”
Por ndoshta Suedia nuk e bën këtë prej zellit libertarian, por prej traditës së dëgjimit të ekspertëve dhe autoriteteve shëndetësore, të cilët besojnë se është më mirë gjurmimi i rasteve individuale dhe jo mbyllja e gjithçkaje.
