Kryedemokrati Lulzim Basha ka mbledhur me urgjencë në selinë blu, sekretarët dhe kryetarët e degëve të Partisë Demokratike.
Mësohet se Basha është shprehur në mbledhje se zgjedhjet e 25 prillit ishin jo të ndershme dhe jo në përmbushje me standartet që kërkon BE apo dhe vetë Shqipëria.
Ai i ka njoftuar krerët e degëve që është ngritur një grup i madh për të mbledhur informacione dhe prova, do të evidentohet të gjitha shkeljet, jo gjatë apo pas zgjedhjeve, por edhe para zgjedhjeve.
“PD nuk mund të njohë një proces zgjedhor si ai i 25 prillit. Mos bini në kurthin e kundërshtarit. Mblidhni faktet e manipulimeve. Ne jemi duke grumbulluar fakte në rrugë ligjore për të mos njohur procesin e 25 prillit. Javën e ardhshme do të nis tur në çdo degë të PD-së”, është shprehur Basha.
Gjithashtu është folur edhe për faktin se shumë kandidatë kanë bërë fushatë më shumë personale, duke bërë joqëllimisht që votuesit të ngatërrohen me numrat dhe shumë fletë votimi të dalin të pavlefshme.
Ndërkohë, ditën e sotme Basha ka reaguar për herë të parë ndaj kritikëve dhe atyre që duan largimin e tij nga posti i kryetarit.
Teksa u pyet nga gazetarët në mesditë pas daljes së tij nga selia, Basha është përgjigjur duke thënë se do të ketë një dalje për mediat dhe se beteja do të vazhdojë deri në fitore.
“Do kemi një dalje të plotë për mediat me të gjitha. Kur të vijë momenti i duhur.”, tha Basha.
