Deputeti i Partisë Socialiste dhe anëtari i Komisionit Hetimor për shkarkimin e Presidentit, Spartak Braho e ka cilësuar Ilir Metën si puçist, për shkak se ky i fundit nuk e njeh parlamentin, të cilin e votoi për Kryetar Shteti. Deklarata e Brahos, u bë mbrëmjen e sotme në emisionin ”Fronline” në News 24.
Lidhur me termin ”çanta e zezë” e Baba Takut, deputeti u shpreh se është shpikur nga vetë ai, por ka vetëm një simbolikë, pasi informacone mund të ketë kushdo.
Ndër të tjera, Braho tha se parlamenti do e shkarkojë Metën me më shumë vota, se kur u emërua Kryetar i Shtetit.
Spartak Braho: ”E di që do ta vuaj këtë punën e çantës së zezë sa të jem gjallë. Simbolike ka qenë. Informacione ka kudo. Çudi e madhe ky parlament që e ka zgjedhur, ky parlament që ka prodhuar brumë, ligje që ai i ka firmosur. Papritur bëhet inekzistent, antiligjor. Këtu e mbushi gotën ai. E kam shprehur që ky që nuk njeh parlamentin, nuk njeh qeverinë është puçist.
Po ky është një raport i ndërtuar mbi bazën e veprimtarisë hetimore të komisionit. Komisioni punoi relativisht në një kohë të shkurtër por të mjaftueshme për të arritur në konkluzionin përfundimtar që pres duhet shkarkuar. Ka tamam 100 faqe dhe kam bindjen që parlamenti do ta shkarkojë më datën 9 presidentin dhe kam bindjen se votat e shkarkimit do jenë më shumë se ato që e emëruan president.”
