Mediat turke shkruajnë se policia ka bërë të mundur ndalimin e një sulmi terrorist së fundmi, mbi Xhaminë e Madhe të “Aya Sofya”.
Mahmut Özden, një terrorist i lartë i Shtetit Islamik, po planifikonte një sulm të madh, ku në shënjestër ishin politikanë, krerë të organizatave joqeveritare dhe figura të tjera të njohura në Turqi.
Autori i njohur ndryshe si Abu Hamzi apo dhe si “emiri turk” i ISIS-it, u arrestua gjatë një operacioni anti-terrorist në provincën jugore të Adanës, njoftoi ministri i Brendshëm turk, Süleyman Soylu.
Özden ndodhet në paraburgim që prej 20 gushtit, ku thuhet të ketë bërë disa rrëfime gjatë marrjes në pyetje. Gjithashtu, hetuesit arritën të konfiskonin nga ai një sërë materialesh të rëndësishme dixhitale.
Sipas ministrit Soylu, këto materiale përfshinin udhëzime nga terroristët e ISIS në Irak dhe Siri, të dhëna mbi strukturën e re të grupit në Turqi, dhe përfshirë synimet e tij për të formuar ekipe prej 10 apo 12 personash të cilët të kryenin sulme.
Policia deshifroi mesazhet e koduara të dërguara militantëve, ku përfshiheshin udhëzime për rrëmbime turistësh, prokurorësh e deputetësh, një sulm mbi bazën ajrore të Incirlikut etj.
