”Do përfitojnë 870 naftëtarë”/ Dautaj zbulon pagën që u dakordësua me Ramën

Në bashkinë e Fierit, u zhvillua një tjetër takim mes kryeministrit Edi Rama dhe naftëtarëve, për të diskutuar për pagën e ndërmjetme që do përfitonin këta të fundit.

Kreu i Sindikatës së Naftëtarëve, Sokol Dautaj ka zbardhur takimin me kryeministrin, teksa tha se është rënë dakord që t’u jepet për 12 muaj nga 40 mijë lekë.

Dautaj u shpreh se nga kjo marrëveshje do të përfitojnë rreth 870 naftëtarë.

“Kemi arritur dakordësinë që të jepet një pagë prej 400 mijë lekësh prej një periudhë 12 mujore si dhe sigurimeve të pagave që do të marrim. Me zgjidhjen e dytë jemi të kënaqur, por me detyrimet e prapambetur që kemi në kohë, duhet të ndiqet rruga ligjore. Në kërkuam një kompromis që duke parë hallet tona pagat të merren dy dhe nga dy. U hodh ideja që po punohet me kompaninë, ne jemi skeptik deri në ardhjen e kompanisë. Numri i naftëtarëve që përfitojnë është 870 naftëtarë. Të gjithë naftëtarët që kanë qenë në listën borderosë nga dhjetori të vitit 2019 do të përfitojnë të gjithë.” tha Dautaj.

Kjo marrëveshje mes qeverisë dhe naftëtarëve erdhi pas ndërprerjes së grevës që naftëtarët kishin nisur prej ditësh, ku kërkonin pagat e prapambetura dhe rikthimin në punë. Fillimisht ato nuk pranonin të uleshin për të biseduar me qeverinë, por pas thirrjeve të kryeministrit Rama për të ndërprerë grevën, u arrit një marrëveshje.