Banorët në Itali duket se nuk kanë një ndërgjegjësim, për të mbrojtur jetën e tyre, ndonëse virusi ka një shtrirje të madhe. Mos ndërgjegjësimi i qytetarëve për tu vetë-izoluar, ka nxjerrë vetë në rrugë kryetarin e Bashkisë së Barit, në Itali.
Antonio Decaro është filmuar në rrugët e qytetit, teksa i urdhëron qytetarët të shkojnë në shtëpi. Mjaft i revoltuar, ai ka lajmëruar banorët që ishin rrugëve, se policia do vinte për pak çaste.
“Duhet të shkosh në shtëpi. Shkoni luani playstation në shtëpi, nuk mund të luani tenis rrugëve. Unë jam kryetari i qytetit, dhe ju duhet të shkoni në shtëpi.
Pas meje po vjen policia. Unë do ta zbatoj dekretin. Nuk është një shfaqje, është një emergjencë kombëtare.
E kuptoni që imazhet që vijnë nga Milano nuk janë një telefilm, e kuptoni apo jo.
Do më sëmurni edhe mua nga zemra”, u drejtohet ai qytetarëve.
Video e publikuar në rrjetet sociale, është kthyer tashmë në virale.
Numri i viktimave në këtë vend po i afrohet shumë shpejt bilancit të Kinës, ku aktualisht përllogariten 3 241 të vdekur, pavarësisht se popullsia kineze është 22 herë më e madhe se ajo italiane.
475 persona humbën jetën vetëm në 24 orët e fundit, duke e çuar në 2978 numrin e viktimave. Numrit të të infektuarve iu shtuan 2 648 persona të tjerë, dhe tashmë prej fillimit të pandemisë në këtë vend përllogariten mbi 35 700 të infektuar.
