Dy deputetë të opozitës Parlamentare, kanë tërhequr firmat e tyre nga nisma për ndryshimin e Kushtetutës. I referohemi deputetëve Artur Roshi dhe Besnik Troplini. Ata deklaruan tërheqjen nga nisma për ndryshimin e Kushtetutës, ku thelbi i saj është ndryshimi i sistemit zgjedhor, kalimin nga listat e mbyllura te ato të hapurat.
Kujtojmë këtu se pak ditë më parë, opozita dorëzoi zyrtarisht në Komisionin e Posaçëm të Reformës Zgjedhore, propozimet e saj se si duhej ndryshuar Kodi Zgjedhor. Myslim Murrizi, i mbështetur nga deputetët e tjerë opozitarë, kërkojnë ndryshimin e Kushtetutës në dy nene. Ata kërkojnë që në zgjedhjet e ardhshme të ketë lista të hapura, dhe të mos lejohen koalicionet parazgjedhore.
Gazeta “Shqip” kontaktoi me Myslim Murrizin, një ndër nismëtarët kryesorë për ndryshimin e Kushtetutës. Ai tha se arsyet e tërheqjes, i dinë vetë deputetët.
“Arsyet e tërheqjes i dinë vetë deputetët, mund t’i pyesni ata vetë. Unë i qëndroj fort madje hapjes së listave dhe shpresoj se do t’ia arrij këtij qëllimi”, deklaroi kryetari i grupit parlamentar demokrat.
Murrizi në reagimin e tij zbulon se nisma e opozitës nuk mund të cilësohet e rrëzuar, me largimin e dy deputetëve firmëtarë, pasi së shpejti do të ketë një lëvizje të re. Bëhet fjalë për shtimin e numrit të deputetëve firmëtarë, duke bërë të mundur kështu arritjen e kushtit prej 1/5 të përfaqësuesve të Parlamentit për ndryshimin e Kushtetutës. “Po do të ketë, edhe të tjerë që do ta firmosin nismën”, ka thënë më tej ai.
