Të tjera të dhëna sensitive janë publikuar nga hakerat iranianë, ku këtë herë bëhet fjalë për një material ku përfshihen emailet e kreut të SHISH-it Helidon Bendo. Hakerat i kanë publikuar këto të dhëna në telegram. Raportohet se janë bërë publike më shumë se 500 emaile të drejtorit të SHISH-it. Ajo që e bën më të rëndë situatën është fakti se në emaile ka edhe të dhëna konfidenciale të sistemeve shqiptare. Gazetari investigativ Artan Hoxha, ka shprehur qëndrimin e tij në lidhje me këtë situatë të rëndë për sigurinë e shtetit. Ai ka paralajmëruar se hakerat do të publikojnë të dhëna të tjera. Artan Hoxha tha se para na pret një dimër i vështirë dhe se sa të pambrojtur janë shqiptarët.
“Hakerat kanë vazhduar duke u përmbajtur në një grafik, çdo fillim jave publikojnë të dhëna. Janë korrekt me oraret. Ne e kemi quajtur si shpartallim të shtetit virtual të Shqipërisë. Do kemi një dimër të vështirë, ata po tregojnë sa thellë kanë hyrë dhe sa të pambrojtur janë shqiptarët”, tha Hoxha.
Gazetari Hoxha theksoi se hakerat kërkojnë të përcjellin një mesazh, dhe të tregojnë se kush është objektivi kryesor i tyre.
“Duhen parë pikat e dobëta për të parë funksionimin. Ata kanë nxjerrë e-mailet e shefit të Shërbimit Informativ Sekret. Imagjino se ku kanë arritur ata. Ky shefi është në SHBA prej një viti. Ata kanë marrë çfarë u është dashur dhe çfarë jo. Hakerat i selektojnë dhe tregojnë se çfarë janë në gjendje të bëjnë”, tha më tej ai.
“Në e-mailet që kanë marrë, janë që ka dërguar dhe që ka marrë nga palë të tjera. SHISH duhet të bëjë dhe njëherë nga e para. Duhet të tërheq agjentët jashtë. Me këto informacione tregojnë objektivin real të tyre. Objektivat i kanë strategjike, se hapën edhe e-mailet e Drejtorit të Përgjithshëm, Nano”, përfundoi gazetari.
