Ambasada Amerikane në Tiranë ka shpërndarë në rrjetet sociale mesazhin e zëdhënësit të Departamentit të Shtetit, Ned Price, i cili ka dënuar sulmin kibernetik ndaj sistemit TIMS në Shqipëri.
Në atë mesazhin në fjalë nënvizohet se SHBA-ja dënon më forcë sulmin, si dhe do vijojë punën për të vënë para drejtësisë përgjegjësit. “Dënojmë me forcë sulmin kibernetik të 9 shtatorit kundër aleates sonë në NATO, Shqipërisë, i cli pason sulmin kibernetik të Iranit të 15 korrikut.
Ne do të vazhdojmë të punojmë krah për krah me Shqipërinë dhe aleatët e partnerët e tjerë, për të forcuar mbrojtjen kibernetike, dhe për t’i bërë përgjegjës aktorët keqdashës”, ka deklaruar zëdhënësi i Departamentit të Shtetit të SHBA-së, Ned Price.
Ministri i Brendshëm, Bledi Çuçi njoftoi më herët se sistemi TIMS është rimëkëmbur në aeroportin e Rinasit dhe pikat kufitare. Ai pretendon se autoritetet shqiptare janë vënë në veprim që në momentin e parë që u pikas ndërhyrja e paligjshme në sistemin TIMS. “Ne kemi punuar prej momentit të parë kur u detektua sulmi kibernetik, për të garantuar mbi të gjitha paprekshmërinë e të dhënave, dhe më pas për rikthimin në normalitet në kohën më të shpejtë të mundshme”, komentoi ministri i Brendshëm, Bledi Çuçi.
