Gjykata e Tiranës dha ditën e djeshme masën e sigurisë “arrest me burg” për Bujar Lezaj. Ky i fundit dyshohet se ka ndihmuar në vrasjen e Behar Sofisë në shkurt të këtij viti në Tiranë, pranë Piramidës. Lezaj, i cili ndodhet aktualisht në burg për “dhunë në familje”, dyshohet se i ka siguruar armën e krimit dhe biçikletën autorit të vrasjes që tronditi Tiranën.
Gjatë komunikimit të masës së sigurisë, Lezaj u përlot duke thënë se nuk ka lidhje me këtë vrasje. “Nuk kam lidhje me vrasjen e Behar Sofisë, dhe as me vrasje të tjera. Për pak ditë do të fitoja lirinë,” mësohet të ketë thënë ai.
Behar Sofia, 66 vjeç, u ekzekutua mëngjesin e 25 shkurtit në Tiranë, në afërsi të Piramidës. Sofia u qëllua nga një armë zjarri me silenciator me dy plumba, njëri prej të cilëve e ka kapur në qafë dhe tjetri në gjoks. Ai u transferua drejt spitalit me shenja jete, por si pasojë e plagëve të marra nuk mundi të mbijetonte.
Nga kamerat e sigurisë, u pa skena e atentatit. Atentatori fillimisht u largua në këmbë dhe në bulevardin “Dëshmorët e Kombit” ka marrë një biçikletë dhe është larguar drejt liqenit Artificial. Kjo biçikletë me të cilën u largua atentatori, nga hetimet rezultoi të ishte siguruar nga Bujar Lezaj, së bashku me armën me të cilën u qëllua Sofia.
Viktima nuk ishte i panjohur për autoritetet. Ai njihej ndryshe dhe si Fatmir Sofia apo Behar Seferi. Emri i Sofisë ka dalë dhe në masakrën e Durrësit ku mbetën të vrarë 4 efektivë policie, gjatë operacionit për arrestimin e Dritan Dajtit.
