Presidenti Ilir Meta ditën e sotme deklaroi publikisht në Komisionin Hetimor Parlamentar se më datë 8 qershor ka pasur informacion për një plan sipas të cilit synohej të digjej Kuvendi i Shqipërisë.
Lidhur me këtë deklaratë ka reaguar edhe Anëtarja e Kryesisë së PD-së, Grida Duma. Kjo e fundit ishte e ftuar në emisionin “5 pyetje nga Babaramo”, prej ku theksoi se opozita ka bërë të pamundurën për të ndaluar revoltën popullore: “Po të kishte dashur opozita të ndërmerrte aksione të dhunshme nuk është çështje dekretesh. Ne kemi bërë të pamundurën të ndalojmë revoltën popullore. E dëgjova që në nisje deklaratën e Presidentit. Në fillesë dëgjova që kisha indicie që persona të caktuar… ju e dini që kur organizohen protesta ata që janë të interesuar që protesta të ketë faqen e bardhë janë organizuesit, pra PD dhe opozita. Të parët e interesuar që të bëjnë pis imazhin e aksionit të kundërshtarit janë kundërshtarët. Njerëz të infiltruar, ky është shqetësimi më i madh nëse do isha organizatore. S’po them që s’janë as të PS-së dhe as të PD-së. Nuk e kam dalluar se jam rrethuar nga studentë dhe të rinj”.
