Ministri maqedonas i Shëndetësisë, Venko Filipçe ka njoftuar se shteti do të forcojë masat kufizuese, me synim frenimin e përhapjes së mëtejshme të koronavirusit.
Në një deklaratë për shtyp, Filipçe i bëri apel qytetarëve maqedonas të rrinë në shtëpi dhe të respektojnë rregullat.
Ai ka paralajmëruar se piku i COVID-19 në vend do të jetë në fund të këtij muaji. Sipas tij, Maqedonia e Veriut është në fazën 2 të përhapjes së koronavirusit, teksa shtoi se nesër do propozojë në mbledhjen e qeverisë intensifikim e masave.
Situata nga koronavirusi duket të ketë precipituar shumë shpejt në Maqedoninë e Veriut, teksa vlerësohet se numri i të infektuarve është shumë i madh, duke marrë parasysh kohën kur ka shpërthyer në vend COVID-19.
Maqedonia e Veriut numëron 555 pacientë me COVID-19 një pjesë e madhe e të cilëve janë anëtarë të stafit shëndetësor.
Gjendja më e rëndë paraqitet në Shkup me 235 të infektuar dhe Kumanovë me 114 e cila që nga e premtja është në izolim. Deri më tani në MV koronavirusi ka marrë 18 jetë njerëzish.
